Настан

Концерт „Танец и Ладо под ѕвездите“

Антички Театар

28.07.2021

22:00 ч.

Продажба на билети

ТАНЕЦ е првиот професионален фолклорен ансамбл во Република Северна Македонија, кој е формиран во 1949 година со цел да ги собира и негува македонските традиционални песни и игри, народните носии и инструменти, и преку соодветен уметнички израз, сценски да го поставува и претставува она што е највредно од богатата ризница на македонскиот народ. ТАНЕЦ, чие име го симболизира македонскиот народен танц (оро) е амбасадор на македонската народна уметност и култура каде и да се појави – без разлика дали е на најоддалечените континенти или меѓу неговите сонародници и во странство и дома. Како конзерватор на уметноста и жив и подвижен музеј на нашето културно богатство. Танец ја шири низ светот убавината на македонските танци и песни, оставајќи свој белег на сцените во Азија, Америка, Австралија, Африка и секаде низ Европа. Во текот на своите 72 години од своето постоење, ТАНЕЦ има учествувано на повеќе од 5000 концерти и фестивали, пред преполните концертни сали во: Њујорк, Сиднеј, Мелбурн, Тел Авив, Рим, Париз, Лондон, Монтреал, Торонто, Аделаида, Мелбурн … Ансамблот не препознава ниту граници, ниту растојанија. Се чувствува како дома насекаде и вратите му се широко отворени каде и да оди.

Ансамблот ТАНЕЦ поседува уникатна збирка на оригинални традиционални носии со исклучителна вредност и убавина, од различни региони во земјата (повеќе од 2000 автентични носии), така што секој концерт на Ансамблот обезбедува единствено аудио-визуелно искуство на публиката ширум светот. Репертоарот се состои од повеќе од деведесет кореографии и неколку стотици вокални, инструментални и вокално-инструментални творби, преку кои ансамблот ги претставува богатите разновидни регионални музички и кореографски традиции и стилови на богатиот македонски фолклор.

Сите вработени во ТАНЕЦ, како индивидуи и како тим, се почитувани низ целиот свет и ги уживаат пофалбите и посебната репутација за нивниот професионален пристап и автентичност на репертоарот. Ансамблот брои 40 извонредни игроорци, 20 неверојатни пејачи и 20 одлични инструменталисти, кои лесно можат да се комбинираат во различни формации. ТАНЕЦ има добиено многу награди и признанија, како Гранд при на Интернационалниот фестивал во Ланголен, Велика Британија, потоа „11 Октомври“, „13 Ноември“ „Св. Климент Охридски“ и „Орден за заслуги за Македонија“.

 

Хрватскиот ансамбл за народни игри и песни ЛАДО е национален професионален фолклорен ансамбл основан во 1949 година, со задача и цел да ги истражува, собира, уметнички да ги обработува и сценски да ги претставува најубавите примери од богатата хрватска музичка и танцова традиција.

Преку својата работа, ЛАДО ги обединува најпознатите хрватски етнокореолози и кореографи, етномузиколози, музички аранжери и фолклористи, но и композитори и диригенти, инспирирани од народната музика. Сето ова резултира со импресивен кореографски и музички репертоар, со повеќе од сто кореографии и стотици вокални, инструментални и вокално-инструментални нумери, во кои е пред сѐ испочитувана оригиналната, автентична народна уметност.

Групата од 38 врвни игроорци, истовремено и извонредни пејачи, лесно се трансформира од танцов ансамбл во репрезентативен фолклорен хор, а 14-те одлични музичари свират на околу осумдесет традиционални и класични инструменти. Ансамблот ЛАДО има уникатна збирка на оригинални народни носии со исклучителна вредност и убавина, така што секоја концертна изведба на ансамблот е исто така и еден вид на модна ревија на оригинална хрватска традиционална облека.

ЛАДО е уникатен ансамбл од светска класа. Концертите на ЛАДО ширум светот се прифатени со посебен ентузијазам од публиката, но и од стручнната критика. Ансамблот има настапувано на некои од најпознатите концертни сцени, како што се: Ројал Алберт Хол во Лондон, Бродвеј во Њујорк, концертната сала Чајковски во Москва, аудиториумот Ман во Тел Авив, како и во многу светски оперски куќи, на фестивали и светски изложби.

За својата работа и заслугите во промовирањето на националното наследство, ЛАДО има добиено многу награди и признанија, како и Повелбата на претседателот на Република Хрватска за 60 години уметничка дејност.

 

SHARE