Новост

Далибалтајан: Носам позитивни импресии од соработката со„Охридско лето“

07.08.2017

SHARE

Please follow and like us:
Instagram

Рубен Далибалтајан, победникот на десет меѓународни натпревари во Ерменија, Кина, Хрватска и Италија, синоќа со својата маестрална изведба на пијано ја воодушеви публиката на фестивалот „Охридско лето“.

Ерменскиот пијанист во магична атмосфера во црквата „Света Софија“ ги отсвири делата од Шопен, Дебиси и Лист.

– Многу сум задоволен, публиката беше внимателна, а и топла. По настапот бев уморен и исцрпен, всушност како и после секој настап, човек се истрошува, се дава себеси на публиката, а тоа е и суштината на оваа професија, изјави Далибалтајан.

Според него, акустиката на просторот каде што се свири е многу важна за севкупниот печаток за еден уметник.

– Црквата „Света Софија“ ја има најубавата акустика од сите места каде што сум настапувал досега и тоа е многу важно за севкупниот впечаток за мојот настап и концертот. Модерните сали често знаат да бидат неакустични, но затоа оваа црква е одлична. Охрид пред се’ е град кој има душа и навистина немам ниту една негативна забелешка, се е во суперлатив и позитив. Во себе носам само позитивни импресии од оваа соработка со фестивалот „Охридско лето“, додаде Рубен Далибалтајан по завршувањето на концертот.

Ерменскиот пијанист рече дека по концертот на фестивалот „Охридско лето“ заминува и со импресии од Охрид, како град каде настапил првпат.

– Првпат сум во Охрид. Неколку дена сум овде и морам да кажам дека веќе сум заљубен во овој град. Времето и климата се идеални, тка што со задоволство би дошол повторно во Охрид, и тоа во скоро време, кажа Далибалтајан.

Инаку овој суптилен пијанист чии изведби секогаш носат нешто ново и позитивно, зад себе има многу успешни проекти , меѓу кои е и основањето на школа за пијано во Макарска во 2005 година, заедно со својата сопруга Јулија Габајдулина. При неговиот престој во Охрид потврди дека ќе продолжи да твори и да ја воодушевува публиката пред која ќе настапува, а како што рече, ќе продолжи да создава и нови млади пијанисти.