Новост

Машкиот манастирски хор „Општина Пустина“ ја наполни црквата „Света Софија“

09.08.2017

SHARE

Please follow and like us:
Instagram

Машкиот манастирски хор „Општина Пустина“ од Русија синоќа ја наполни црквата „Света Софија“ настапувајќи во рамките на музичката програма на 57-то издание на фестивалот „Охридско лето“.

Под диригентска управа на Александар Семенов како солисти настапијa Александар Горбатенко – контратенор, тенорите Александар Детинкин и Евгениј Михеев, баритонот Дмитриj Писарев и Владимир Милер – бас профундо, како и гостите Иван Томашев – бас баритон од Србија, неговата сонародничкa, сопранистката Сања Керкез, како и македонската сопранистка Милена Арсовска.

На програмата беа избрани духовни композиции, грегоријански распеви, старобугарски распеви, манастирски песни, херувимски песни, духовни песни на Борњански, Чесноков, Рахмањинов, Трубачев, Свиридов, Садовски, како и на Шуберт.

-Прв пат настапуваме во Македонија, и првпат сме дел од фестивалот „Охридско лето“ така што ова е едно ново искуство за нас. Самата црква каде што настапивме има прекрасна акустика. Тоа посебно одговара со нашиот тип на музика, така што наш заеднички впечаток е дека направивме една извонредна композиција и дека публиката навистина уживаше во изведбите, велат членовите на машкиот црковен хор.

Српската сопранистка Сања Керкез исто така првпат настапи на фестивалот „Охридско лето“ иако повеќе од две децении е постојан гостин во Македонската опера и балет со најразлични улоги.

– Исклучително сум задоволна што настапив на „Охридско лето“ со еден ваков ансамбл, еден ваков хор, составен од врвни уметници, академски граѓани, музички образовани и сите се солисти. Ова беше нешто величенствено, да се пее духовна музика во ваков простор, иако, морам да признам дека тоа не е мој фах. За мене беше малку напорно да слушам ваков вид хармонија поради тоа што сум навикната на оркестар, инструменти, а не ваков вид на акапела. Не е лесно, но секако мора да се стекне некое искуство, појаснува сопранистката Керкез.

Македонската сопранистка Милена Арсовска по 10-тина години повторно е во црквата „Света Софија“. Како што вели, задоволна е од одзивот на публиката која со големо внимание го проследи концертот.

– Публиката беше одлична и после еден ваков концерт јас сум навистина многу исполнета. Послениве десет години живеам во Виена, но патувам постојано затоа што работам и во Германија и во Чешка. Во Македонија имав неодамна концерт со Македонската филхармонија, а последен пат настапив на фестивалот „Охридско лето“ на концертот со Дуке Бојаџиев. Пред да се иселам од Македонија, бев дел од Македонската филхармонија и со тоа секоја година бев дел од фестивалот. Но сепак, денес пое толку години повторно ја почувствував таа магија, вели Арсовска.

Машкиот хор „Оптина Пустина“ е основан во 1996 година во рамки на монаштвото на областа Оптина Пустин во Санкт Петербург. Уште од првите денови на основањето хорот постојано го надградува својот репертоар што се состои од стари и нови екслезиастички пеења. Како резултат на нивната работа откриени се и изведени бројни манускрипти кои постоеле во различни академски библиотеки во Русија и во светот, а нивните концерти вклучуваат пеења не само од руската традиција, туку и од ортодоксните традиции на Грција, Бугарија, Србија и Грузија, како и модерни аранжмани на стари пеенија и религиозни композиции на руски композитори.

Основачот на хорот и негов уметнички раководител Александар Семенов дипломирал хорско диригирање на Конзерваториумот во Санкт Петербург, се усовршил во областа на оркестарското диригирање, а ја проучувал и старо-руската музичка нотација.

Хорот е составен од професионални музичари, дипломци на Конзерваториумот во Санкт Петербург, меѓу нив е и познатиот бас Владимир Милер (солист на театрот „Марински“, национален уметник на Русија), како и наградуваните солисти Александер Горбатенко (контра-тенор), Дмитри Шишкин (бас), Дмитри Писарев (баритон), Борис Петров (баритон), Евгениј Микхеев (тенор), Андреј Иванушкин (тенор), Виктор Капров (бас), Сергеј Григориев (бас).

Во дведецениското уметничко делување хорот остварил настапи во повеќе од 30 градови во Русија, а има реализирано турнеи во Белгија, Унгарија, Германија, Холандија, Шпанија, Италија, Кина, Колумбија, Норвешка, Србија, Црна Гора, Финска, Франција, Шведска, Естонија и Украина.

Нивни концерти се одржани во Катедралната црква на Кремљ во Москва, Катедралата „Св. Софија“ во Нижни Новгород и Киев, во бројни катедрални цркви во западна Европа, како и во повеќе концертни сали.

Во 2006 издавачката куќа „Ворнермјузик“ го издава ЦД-то снимено со италијанскиот ансамбл „Солистивенети“ и Клаудио Шимоне, а во досегашната дискографија на хорот се впишани и 14 други албуми.