Музичката програма на фестивалот „Охридско лето“ вечерва ќе биде збогатена со настап на Филхармонискиот оркестар на театарот во Болоња и виолинистот Давиде Алоња. Концертот ќе се одржи во катедралната црква „Света Софија“ со почеток во 21 часот и е во рамки на традиционалната Италијанска вечер што секоја година се организира на фестивалот.
Филхармонискиот оркестар на театарот во Болоња е основан во 2008 година од дел од музичарите на оперскиот оркестар. Нивната мисија е да ја промовираат класичната музика во Болоња, притоа гарантирајќи неприкосновен уметнички квалитет. Филхармонискиот оркестар на театарот во Болоња и истиот ваков оркестар кој дејствува во рамките на Миланската „Скала“, се единствени два ансамбли во Италија од овој вид.
Уште од неговото основање, овој филхармониски оркестар внимателно ја одбира програмата која ја претставува во аудиториумот „Манцони“, па така тие прават серија оркестарски циклуси на кои го изведуваат симфонискиот опус на Сергеј Рахмањинов, Лудвиг ван Бетовен и Петар Илич Чајковски. Со оркестарот настапуваат звучни музички имиња како пијанистите: Иво Погорелиќ, Филип Ентремон, Александар Лонквих, Лилја Зилберштајн, Анџела Хјуит, Луи Лорти, Данил Трифонов, Александара Романовски, Александар Малофеев и Бенедето Лупо; виолинистите: Гидон Керемер, Сара Чанг, Јулиан Рахлин, Сергеј Крилов, Баиба Скриде, Ана Тифу и Марк Бучков; челистите: Миша Мајски, Давид Герингас и Киан Солтани, под диригентските палки на сер Невил Маринер, Герд Албрехт, Михаил Плетњов, Александер Ведерников, Габор Такач-Наги, Пол Гудвин, Азиз Шохахимов и Микеле Мариоти. Од 2014 до 2019 година оркестарот секоја година остварува турнеи во Јапонија настапувајќи во Токискиот „Сантори Хол“ и „Орчард хол“.
Од 2022 година шеф диригент на оркестарот е Роберто Абадо, и од тогаш започнува ново и значајно поглавје за овој оркестар. Меѓу другото, оркестарот настапува на престижниот фестивал „Жорж Енеску“ во Букурешт, како и на Фестивалот „Амиата“ во Италија.
Покрај редовните концерти, оркестарот особено внимание посветува на камерната музика, настапувајќи во палатата „Капрара Монпенсиер“, и настојува преку соработка со општинските власти на Болоња да ја шири музиката и надвор од централните градски подрачја.
Давиде Алоња е еклектичен музичар со широко интернационално образование. Дипломира виолина и пијано со високи оценки на Конзерваториумот „Џ. Верди“ во Комо, а магистрира виолина и камерна музика на Парискиот конзерваториум со едногласна највисока оценка. Студира и композиција на Академијата „Чигиана“ во Сиена во класата на Џулијано Кармињола кој го опишува како “неверојатен талент“. Тој е еден од најпосветените музичари на италијанската музика на 20 век, проучувајќи, изведувајќи или снимајќи дела кои ѝ се делумно непознати на музичката јавност. Неодамна сними ЦД со дела за виолина и оркестар придружуван од Лондонскиот симфониски оркестар, а од 2023 година е резидентен солист на камерниот оркестар „Музичари на Скала“ (I musici della Scala) во Милано. Алоња предава виолина на Конзерваториумот „Џ. Верди“ во Комо.
