Спектакл под свеќи исполнет со многу емоции приреди Камерниот оркестар „Профундис“ и младиот виолончелист Петар Пејчиќ преку концертот што вчеравечер го организира НУ „Охридско лето“. Бројната публика што ја исполни големата сала во Македонската филхармонија во Скопје ги награди уметниците со бурни оваации и повеќе бисеви.
Безвременото музичко патување насловено „Timeless“ под диригентската палка на маестра Ѓурѓица Дашиќ ексклузивно го долови саундтракот од филмот „The Houres“, дело со длабока емотивност и суптилни динамики кои совршено одговараа на звукот на ансамблот „Профундис“. И целокупната програма, според директорот на НУ „Охридско лето“, Ѓорѓи Цуцковски, беше емотивна и атрактивна за љубителите на класичната музика.
-На програмата беше и Унгарската рапсодија на Давид Попер, едно од најпознатите и највиртуозни дела за виолончело, кое секогаш предизвикува воодушевување поради неговата драматичност, техничка комплексност и раскошен карактер, и секако, поради моќта на солистичката изведба на совршениот Петар Пејчиќ. Беа изведени и Рококо варијациите на Чајковски, најелегантните и најчесто изведувани дела од романтизмот.Во целина, тоа беше програма која беше доста сензитивна, емотивна и пред сè, атрактивна за публиката, вели Цуцковски.
Со својата виртуозност, музикалност, неверојатна техника, сценски изглед и харизматична изведба, младиот виолончелист Петар Пејчиќ со години го привлекува вниманието на љубителите на класичната музика. Неговите успешни настапи на некои од најголемите светски сцени го поставуваат како еден од врвните уметници на својата генерација. Награден е на неколку престижни меѓународни натпревари, вклучувајќи го Вториот меѓународен натпревар на Кралицата Елизабета, и е дел од програмите на престижни академии и фондации.Пејчиќ изведува дела од најголемите композитори со исклучителна техника и емоционална длабочина, создавајќи неповторлива музичка атмосфера која остава траен впечаток. Критичарите го нарекуваат „надарен музичар со огромен сценски шарм“.
