„Вечер на камерна музика со ансамблот на Игњац Фукс“, Хрватска

  Македонската виолинистка Фросина Богданоска потекнува од уметничко семејство под чија закрила ги прави првите чекори и успеси со свирењето на виолина. Во 2001 година се запишува на Националниот музички конзерваториум во Тулуз, а дипломски и постдипломски студии завршува на Факултетот за музичка уметност во Скопје. Своето образование потоа го продолжува на Кралската академија во Лондон, а две години подоцна запишува специјализација на Универзитетот за музика и изведувачки уметности во Виена. Покрај солистичката дејност, Богданоска често настапува и во камерни состави. Хрвоје Филипс своето музичко образование го стекнува во Хрватска. Од 1997 година работи како виолист во оркестарот на Хрватскиот народен театар во Загреб, а три години подоцна станува член на познатиот состав „Загребачки солисти“. Од 2004 година е член на симфонискиот оркестар на ХРТ , а една година подоцна станува и еден од членовите на Загребскиот квартет. Илин – Диме Димовски е еден од најактивните македонски контрабасисти. Вработен е во филхармонискиот оркестар на градот Загреб, постојан соработник е на симфонискиот оркестар на ХРТ, а редовно се појавува и со хрватскиот барокен ансамбл, „Загребски солисти“, ансамблот за современа музика „Кантус“, како и со Хрватскиот камерен оркестар. Во исто време соработува и со интернационалниот оркестар „Без граници“ и италијанскиот симфониски оркестар „Сан Марко“. Добитник е на повеќе национални и интернационални награди за контрабас и камерна музика. Дарио Голчиќ е хрватски обоист, добитник на повеќе награди во и вон Хрватска. Своето образование го започнува во родната земја, а подоцна се усовршува кај обоистите Хајнц Холигер и Кристијан Шмит. Во текот на своите студии имал чест да настапува со значајни ансамбли од Германија, Хрватска, Швајцарија. Моментално работи како обоист на симфонискиот оркестар на националната ХРТ и како доцент по обоа на Музичката академија во Загреб. Александар Тасиќ е еден од најеминентните кларинетисти на својата генерација. Како солист досега има настапувано со повеќе значајни оркестри на концертните подиуми во Србија и странство, под диригентската палка на еминентни имиња. Чест гостин е и на најпрестижните фестивали во Европа и Азија. Тасиќ е претставник на познатиот произведувач на опрема за дувачки инструменти „Вандорен“ од Франција и американската компанија за изработка на кларинети „Ројал“. Јана Павловска – Молц своето образование го започнува во Македонија. По дипломирањето, се запишува на магистерски студии на Колеџот по изведувачки уметности во Чикаго, кои успешно ги завршува, а во моментов е на докторски студии на Универзитетот во Илиноис. Постојано е активна на музичките сцени во светот, каде често соработува со значајни музичари. Добитник е на голем број награди на национални и интернационални натпревари.   Програма:   Александар  Арутиуниан (1920-2012): Суита за трио за кларинет, виолина и пијано   Сергеј Прокофјев (1891-1953): Квинтет        g-moll, оп. 39

1. Tema con variazioni
2. Andante energico
3. Allegro sostenuto, ma con brio
4. Adagio pesante
5. Allegro precipitato, ma non troppo presto
6. Andantino

    Јохан Михаел Хајдн (1737-1806): Трио за обоа, виола и контрабас