Со дела за флејта и пијано од познати светски композитори синоќа во црквата „Света Софија“ во рамките на фестивалот „Охридксо лето“ настапија истакнатите уметници Елвис Руди и Марин Ѓолма од Република Албанија.
-За настапот на „Охридско лето“ одбравме две француски сонати од периодот на импресионизмот kако што е втората соната од Филип Гобер и Пјер Санкан, а помеѓу двете сонати свиревме една голема концертна соната од Фридрих Кулау.Се работи за светсски репертоар а исто така и композиторите се светски, вели познатиот флејтист Елвис Руди.
Според него, голема е честа да се настапува на фестивал којшто има долга традиција и чии сцени настапиле плејада звучни имиња од светот на музиката.
-„Охридско лето“ е фестивал со богата историја која датира од 1961 година и голем европски настан во полето на културата. Тоа многу ни значи нам кои настапуваме на оваа сцена и ни претставува голема чест што можеме да настапуваме на еден ваков голем фестивал кој е поддржан и од самата држава, вели Руди.
И неговиот колега, пијанистот Марин Ѓолма е восхитен од амбиентот на самата црква каде што настапија, а особено важна, според него е акустичноста на просторот каде што музицираа синоќа.
-Акустиката во црквата е прекрасна и секогаш зависи како го ние го восприемаме звукот од инструментите на кои свириме и како публиката го слуша истиот тој звук. За акустични инструменти, секако сметам дека е извонредна, додава Ѓолма.
Ова е трет концерт на кој Елвис Руси и Марин Ѓолма настапуваат како дуо. Нивниот репертоар со композиции за флејта и пијано со високи уметнички перформанси, ја воодушеви публиката која синоќа го следеше нивниот настап на 58-то издание на фестивалот „Охридско лето“.
