Александер Мелников, пијано (Русија/Германија)

Александер Мелников – пијано

Александер Мелников студиите ги завршува на Московскиот конзерваториум во класата на Лев Наумов, а уште на рана возраст лично го запознава Свјатослав Рихтер кој подоцна редовно го поканува на неговите фестивали во Русија и во Франција. Мелников е добитник на бројни награди и признанија меѓу кои и на Интернационалниот натпревар „Р. Шуман“ во Цвикау (1989) и на престижниот конкурс „Кралица Елизабета“ во Брисел (1991).

Како солист има остварено настапи со светски познати оркестри и ансамбли меѓу кои:  оркестарот „Концертгебау“ во Амстердам, „Гевандхаус“ оркестарот во Лајпциг, Симфонискиот оркестар на Филаделфија, оркестарот  НДР во Елбфилхармонијата во Хамбург,  Радиооркестарот во Минхен,  филхармониите во Минхен и во Ротердам и Оркестарот Би-би-си во Лондон под диригентските палки на меѓу останатите: Михаил Плетњов, Теодор Куренцис, Шарл Дутоа, Пааво Јерви, Томас Даусгард, Максим Емелјаничев, Владимир Јуровски и др.

Особено активен на полето на камерната музика, Мелников настапува во пијано дуо со Андреас Штајер, редовно концертира со виолончелистот Жан-Гијен Кејрас и е долгогодишен дуо партнер на реномираната виолинистка Изабел Фауст со која се добитници на наградата „Грамафон“ и се номинирани за наградата „Греми“. Заеднички ова дуо го снима целиот опус на сонати за виолина и пијано на Л. В. Бетовен за издавачката куќа „Хармонија мунди“, а исто така продолжуваат во опсежни проекти снимајќи ги сите сонати за виолина и пијано на Брамс (издадени во 2015) и на  Моцарт (изданија промовирани во 2018 и 2021 година). Соло изданието на Мелников на „Прелудиуми и фуги“ од  Д. Шостакович е вброено во листата на „50 највлијателни снимки на сите времиња“ од страна на списанието „Би-би-си Мјузик“.

Албумот „Посета на Рахмањинов“ снимен со сопранистката Јулија Лежнева и издаден за „Хармонија мунди“ минатата година, е прв албум што е снимен на оригиналниот инструмент кој му припаѓал на Сергеј Рахмањинов и се чува во неговата вила „Сенар“.

Во сезоната 2025/2026, Александер Мелников ќе настапи со повеќе престижни оркестри како: НДР оркестарот во Елбфилхармонијата во Хамбург, оркестарот „Утопија“, Лондонската филхармонија, Националниот оркестар во Лион, Камерниот оркестар во Париз, ВДР оркестарот во Келн, Филхармонијата во Осло, Финскиот барокен оркестар, и Академијата за стара музика во Берлин со диригентите: Максим Емелјаничев, Табита Берилунд, Хану Линту, Наталија Пономарчук и Јан Содерблом, а и самиот ќе настапи во улога на диригент и изведувач. Рециталните настапи ќе го водат во „Вигмор Хол“ во Лондон, во „Флаже“ во Брисел и во Аудиториумот во Лион, а на крајот на сезоната го очекуваат настапи низ Азија и концерти во Јапонија, Хонг Конг, Кореја и Кина.