Западен Балкански младински оркестар Подиум на млади

Младински оркестар на Западен Балкан

Младинскиот оркестар на Западен Балкан е основан врз база на едноставно, но моќно уверување дека музиката успева да ги зближи луѓето онаму каде честопати зборовите и политичарите не успеваат. Во регион кој сè уште ги лечи раните по распадот на поранешна Југославија, овој оркестар создава уникатен простор за креација на младите музичари од различни земји и култури, помагајќи им да ги надминат разликите и да се сплотат во заедничка уметничка креација. Инспириран од духот на Европските летни музички академии кои се одржуваат во Приштина од 2012 година, оркестарот официјално е формиран во 2019 година под уметничко раководство на диригентот и пијанист Десар Сулејмани.

почетоците, иницијативата прераснува во образовна платформа за млади музичари  од Западен Балкан и од Европската Унија, но и од други земји. Она што започнува како група индивидуалци со различни традиции, се трансформира во компактен оркестар преку бројните денови на проби, заеднички предизвици и моменти на музички откровенија. Низ процесот на припреми, работата со искусни музичари и ментори, преку турнеи и концерти – учесниците во оркестарот се оформуваат во искусни професионалци подготвени за идните меѓународни соработки. Во овој процес, музичките квалитети одат рака под рака со културната размена, дијалогот и личниот развој. Преку спојот на млади уметници од различни култури се поттикнува процесот на учење, заедничко музицирање и раст и развој, со што овој уникатен оркестарски ансамбл не само што ги премостува разликите туку гради мостови кои се протегаат многу подалеку од оркестарската сцена.

Искуството кое им се нуди на младите музичари излегува и надвор од процесот на проби и изведби во живо. Преку заедничкото дружење и вежбање, тие создаваат пријателства кои ги надминуваат границите и стереотипите. На сцената членовите на оркестарот покажуваат дека соработката не е само возможна туку е и моќна алатка која води кон создавање на единствен заеднички звук. Концертите кои ги одржуваат во сите земји на Западен Балкан го покажуваат духот на заедничката соработка видлив и за публиката, на тој начин трансформирајќи го оркестарот во симбол на надеж и во пример за тоа како иднината на регионот може да изгледа.

Од основањето, оваа иницијатива е поддржана од повеќе Ротари клубови и од меѓународни партнери чија посветеност придонесува кон стабилна одржливост на проектот и неговите професионални и образовни активности. Преку мрежата на поддржувачи, институции и локални партнери оркестарот продолжува со своите достигнувања и значење.

Денес Младинскиот оркестар на Западен Балкан е повеќе од само музички ансамбл – тој е мост кој ги охрабрува уметниците од новата генерација да бидат амбасадори на дијалог, разбирање и соработка во регион каде таквите гласови се повеќе од потребни.