Драмската програма на 57-то издание на фестивалот „Охридско лето“ синоќа на сцената „Долни Сарај“ донесе премиера на театарската претстава „Сон на летната ноќ“ од Вилијам Шекспир, режирана од Џон Блондел, а во изведба на Битолскиот народен театар.
Пречекани од многубројната публика, а испратени со громогласен аплауз, актерите и целиот тим на Битолскиот народен театар изјавија огромна благодарност до „Охридско лето “ што им овозможи премиера на нивниот проект подготвуван во текот на изминатите месеци.
Според нив, , режисерот преку оваа претстава уште еднаш не’ учи што значи да се биде човек, каде да се најде радост и како да се справиме со загубата.
– Срцето ми е полно што охридската публика одлично ја „прими“ претставата.Просторот исто така е феноменален. Многу е различно да се игра на ваква сцена, во споредба со театарската класична сцена. Од секаде се слушаат различни звуци и тоа е она што ти дава дополнителна мотивација за да играш и дадеш нешто повеќе. Ова е моја прва соработка со режисерот и претставува едно убаво искуство за мене. Поминавме низ еден процес на самоистражување. Во претставата има вметнато неколку музички елементи, дел од познати песни на групата „Блонди“, што е доста автентично. Улогата што јас ја толкувам, самовилата Титанија е една силна жена, кралица на самовилите, жена на Оберон и поради сето ова, целиот проект и самата улога ја сметав за еден предизвик, вели Катерина Аневска, актерка од Битолскиот народен театар.
За актерот Петар Спировски, посебно е чувството да се глуми на сценските простори на фестивалот „Охридско лето“.
– „ Охридско лето“ секогаш се покажува во најдобро светло, како и ние, Битолскиот народен театар, и поради тоа секогаш имаме успешна соработка. Посебно е чувството да се игра претстава на овие простори, Долни Сарај, црквата „Света Софија“, Античкиот театар и слично. Ова е мојот трет проект со Џон Блондел, режисерот на оваа претстава. Предизвикот да се работи Шекспир е навистина огромен, посебно улогата која што јас ја имам Зевзек или во други преводи Задрогаз. Предизвик од секогаш ми беше да ја играм токму оваа улога и јас уживав во неа. Ова е на некој начин исполнување на дел од моите соништа, вели актерот Спировски.
Според режисерот на претставата, Џон Блондел и директорот на Народниот театар од Битола, Иван Јерчиќ, реакциите на публиката за оваа театарска изведба беа крајно позитивни.
И за овој драмски проект на фестивалот „Охридско лето“, како и за мега-спектаклот „Вивалдијано“ што се одржа завчера на Антички театар, се бараше карта повеќе.
